अन्धकारमा छ ‘सुन्दर सानो खाम्दिङ्ग’


सोलुखुम्बु । गाउँमै उत्पादन हुने लघु जलविद्युतमा खराबी र केन्द्रीय प्रसारण लाइन आपूर्ति नहुँदा सोलुखुम्बु जिल्लाको सोलुदुधकुण्ड नगरपालिका वडा नं १०, सानो खाम्दिङ्गका स्थानीयहरु अन्धाकारमा दैनिकी विताउन वाध्य छन् । नियमित विद्युत आपूर्ति नहुँदा स्थानीयहरु आठ महिनादेखि अन्धकारमा जीवन बिताउन बाध्य भएका हुन् ।
वाडको विभिन्न टोलहरुमा २०७९ वैशाख ९ गतेदेखि विद्युत परीक्षण गरेर केन्द्रीय विद्युत् लाइन प्रवाह भैरहेको छ । तर, सानो खाम्दिङ्गका स्थानीय भने अँध्यारोमा बस्नुपर्दा जनजीवन कष्टप्रद बनेको स्थानीयहरुको दुखेसो छ । गाउँमै उत्पादन लघु जलविद्युतमा खराबी र केन्द्रीय प्रसारण लाइन आपूर्ति नहुँदा यहाँको आठ घरमा विद्युत आपूर्ति बन्द छ । गाउँमा विद्युतको पोल गाडिएको छ तार टाँगिएको छ । तर, बक्ती बल्दैन । यसरी अन्धाकारमा घरायसी काम गर्न असहज र विद्यार्थीहरूलाई पढ्न समस्या झेलिरहेका छन् । स्थानीयहरु मोवाइल व्याट्री चार्ज गर्न समेत आधा घण्टाको पैदल हिँडेर छिमेकी गाउँमा गुहार माग्नुपर्ने बाध्यतामा छन् । गाउँलेको मोवाइल संकलन गरेर चार्ज गर्न जाने गरेको र फोन गर्न समेत समस्या भएको स्थानीय बताउँछन् ।
स्थानीयले पटक पटक स्थानीय तह र विद्युत प्राधिकरणमा समस्या समाधान गर्न आग्रह गरेपनि कुनै सुनुवाई भएको छैन । कामको जिम्मा लिने ठेकेदार समेत आफूले जिम्मेवारी पूरा गरेर जिम्मा दिई सकेको भन्दै पन्छिने गरेका छन् ।
केही घरमा सानो सौर्य उर्जा प्रणाली जडान गरेको भएपनि अधिकांश घरमा वैकल्पिक व्यवस्था हुन नसक्दा परम्परागत रुपमै दियालो र टुकीको भर पर्नुपर्ने बाध्यता छ । एक स्थानीयले भने ‘सोलार जोड्न आर्थिक अवस्था हैसियत पुग्दैन, अँध्यारोमा नै सरकारलाई सराप्दै बस्नु परेको छ ।’
प्राधिकरण सोलु कोरीडोर ग्रामिण विद्युत आयोजनाले भने २०७९ वैशाख ९ गतेबाट नै सानो खाम्दीङ लगायत वडा नं. ८, ९, १० र नेचासल्यान गाउँपालिका वडा नं. १ क्षेत्रमा केन्द्रीय विद्युत नियमित रुपमा प्रवाह भई रहेको जनाएको छ ।